Tá comhairleoir de chuid an TUV ag tógáil raice ar an Bhaile Mhéanach mar gheall ar fhocal Gaeilge.
Tá an focal uisce scríofa ar chlúdaigh comhlaí uisce a cuireadh isteach ar na mallaibh i lár an bhaile.
Tá an Béarla ann chomh maith ach tá Timothy Gaston ag iarraidh ar an chonraitheoir iad a bhaint amach agus cinn úra aonteangacha a chur isteach chomh luath agus is féidir.
Dar leis gur chinn an conraitheoir “na cinn Éireannacha” a úsáid seachas “na cinn Tuaisceart-Éireannacha”
Is féidir leis an Tuairisceoir a léiriú gur clúdaigh de chuid Uisce Éireann atá iontu seachas Uisce Thuaisceart Éireann.
Deir Timothy Gaston go ndeachaigh daoine i teagmháil leis ar an ábhar agus go bhfuil súil aige gur dearmad a bhí ann.
Is é an Leas-Mheara é ar chomhairle lár agus Oirthear Aontroma.
Mac le Sam Gaston, a bhí ina chomhairleoir de chuid an DUP, is ea é.
D’éirigh leisean cur ina luí ar McDonalds ar an bhaile an focal ‘Yield’ a bhaint de chomhartha dá gcuid agus ‘Give Way’ a chur ina áit tamall de bhlianta ó shin.Dar leis go n-úsáidtear ‘Yield’ sa Phoblacht agus ‘Give Way’ ó thuaidh.
Deir urlabhra ar son Chomhairle Lár agus Oirthear Aontroma “go bhfuil siad ag amharc isteach” san ábhar.
Deir an chomhairle nach féidir go bhfuil mórán acu ann cibé ar bith.
Tuairisceoir an Dúin 